မူပိုင်ရှင်....

ငယ်စဉ်ကပါလာတဲ့ “အကျင့်” (သို့မဟုတ်) “ဗီဇ” ဆိုတာ လူတိုင်းမှာရှိကြပါတယ်..။
ကျမနားလည်သလို ပြောရမည်ဆိုလျှင် “အကျင့်” ဆိုတာ လူတယောက်ရဲ့အမြဲတစေ လုပ်လေ့လုပ်ထရှိတဲ့ အပြုအမူ မျိုးကိုဆိုလိုပါတယ်။
“ဗီဇ” ဆိုတာကတော့ မွေးရာပါ စိတ်ဓာတ်နဲ့ အလေ့အကျင့် လို့ ကျမအနက်အဓိပ္ပါယ်ဖွင့်ဆိုပါရစေ။

လူမှန်းသိတတ်စ အရွယ်ကတည်းက စိတ်ကောက်တတ်တဲ့ ကျမရဲ့အကျင့်လေးဟာ အခုချိန်ထိ ဖျောက်ဖျက်လို့မရခဲ့ပါဘူး။
ကျမလိုပဲ ကျမရဲ့မေမေဟာလည်း စိတ်ကောက်လွယ်သူတယောက်ဖြစ်ပါတယ်။
အမေတူသမီးမို့ စိတ်ကောက်တတ်တဲ့အကျင့်ကလေးတခုဟာ ကျမအတွက် မျိုးရိုးလိုက်တဲ့ ဗီဇလို့ခေါ်မလားပဲ..။

ကျမမှတ်မိသလောက် ပြောရမယ်ဆိုရင် ကျမ မူလတန်းကျောင်းသူဘဝက စ လို့ အခုချိန်ထိ ပါလာခဲ့တဲ့ အကျင့်လေးတခုကိုပြောပြချင်ပါတယ်

။
မူလတန်းအချိန်က အကြောင်းတွေကို သေခြာ မမှတ်မိတော့ပေမယ့် အလယ်တန်းကျောင်းသူဘဝက အကျင့်လေးတွေကိုတော့ မှတ်မိနေပါသေးတယ်။
စာလုံးလေးတွေကို ဝိုင်းအောင်ရေးလေ့ရှိတဲ့ ကျမဟာ ခဲတံနဲ့ ဘောပင်လှလှလေးတွေကို ကျမရဲ့
ကွန်ပါဘူးထဲမှာ အမြဲဆောင်ထားလေ့ရှိပါတယ်။
စာရေးရာမှာလည်း အရောင်စိုသောမှင်၊ လက်ရေးလှစေရန် ပွိုင့် ဟုခေါ်သော ဘောပင်၏ ထိပ်မှ
ဘောစိ သည်လည်း အရေးပါတာမို့ ရေးလို့ကောင်းသော ဘောပင်လေးများကိုသာ ရွေးဝယ်လေ့ရှိပါတယ်။

ကျမမှာ အကျင့်တခုရှိတယ်။ ဘောပင်တချောင်း ရေးလို့ကောင်းပြီဆိုလျှင် အဲဒီဘောပင်ကို
မှင်ကုန်သည်အထိ စွဲပြီး ရေးလေ့ရှိတယ်။
အဲဒီဘောပင်ကို သူငယ်ချင်းတွေက ငှါးရေးရင်လည်း ကျမ မပေးဘူး။
အပိုဝယ်ထားတဲ့ ကွန်ပါဘူးထဲက ဘောပင် ၃/၄ ချောင်းကိုသာ သူငယ်ချင်းတွေကို ငှါးလေ့ရှိတယ်။

အဲဒီခေတ်က အတန်းထဲမှာ ဆရာမက ရှေ့ကနေ ခေါ်ပေးတဲ့စာကို ကျမတို့က လိုက်ရေးရတာလေ။ လက်ရေးလှဖို့ အသားပေးပြီးရေးတတ်တဲ့ ကျမဟာ စာရေးရာမှာ နှေးကွေးတဲ့အတွက် ဆရာမခေါ်ပေးတဲ့စာကို
မနည်းလိုက်ရေးခဲ့ရတာပေါ့ရှင်။
ဒီကြားထဲ အရေးကြီးတဲ့စာကြောင်းတွေကို မှင်နီတားရတဲ့နေရာ၊ စာလုံးအရေးမှားလို့ Correction Pan နဲ့ဖျက်ရမယ့် အခါမျိုးတွေမှာ ကျမဟာ တခြားကျောင်းသူတွေထက် ပိုပြီးကြာတတ်ပါတယ်။
အကြောင်းရင်းကတော့ ကျမရဲ့ မင်နီဘောပင်၊Correction Pan နဲ့ ပေတံ တွေဟာ ကျမအသုံးလိုတဲ့အချိန်မှာ
ကျမရဲ့ရှေ့မှာ အဆင်သင့်ရှိမနေပဲ သူငယ်ချင်းတွေရဲ့လက်ထဲကို ရောက်နေတတ်လို့ပါပဲ။

ကျမမှာ သူတို့နဲ့ မတူတဲ့အချက်ကတော့ ကျမရဲ့လွယ်အိတ်ထဲမှာ ကျောင်းသုံးစာရေးကရိယာ
အစုံအလင်ကို အမြဲဆောင်ထားတတ်ပါတယ်။
ကျမရဲ့ ဘေးတဖက်တချက်ဆီမှာ ထိုင်တဲ့ ကျမရဲ့သူငယ်ချင်းတွေကတော့ အဲဒီပစ္စည်းတွေကို ဝယ်ဖို့ စိတ်ကူးထဲတောင်ရှိပုံမရပါဘူး။
ကျမရဲ့ကွန်ပါဘူးထဲက ပစ္စည်းတွေဟာ သူတို့လိုသလို ယူငင်သုံးစွဲလို့ရနေတာကိုး။
သူတို့စာရေးတော့မယ်ဆိုလျှင် ကျမရဲ့ကွန်ပါဘူးကိုဖွင့်ပြီး သူတို့ကြိုက်တဲ့ဘောပင်ကို ယူရေးလေ့ရှိပါတယ်။


ကျမဟာ တွန့်တိုတတ်သူ တယောက်မဟုတ်ပေမယ့် လိုအပ်လျှင် အဆင်သင့်ရှိနေစေဖို့
စာရေးကရိယာအစုံအလင်ကို ဝယ်ထားခဲ့တာလေ...။
အခုတော့ ကျမလိုအပ်တဲ့အချိန်မှာ စာရေးကရိယာပစ္စည်းတွေဟာ ကျမအတွက်မဟုတ်ပဲ
သူငယ်ချင်းတွေအတွက်ဖြစ်နေတတ်ပြီး ကျမဆီကို ပြန်ရောက်လာဖို့ နှောင့်နှေးရင်း
ကျမအတွက် စိတ်ရှုပ်စရာဖြစ်လာခဲ့ရတယ်။

အဲဒီနောက်ပိုင်းမှာတော့ ကျမဟာ စာရေးကရိယာများကို ကျမအတွက် တစုံနဲ့
သူငယ်ချင်းများသုံးရန် တစုံ သတ်မှတ်ပြီး ဝယ်တဲ့စနစ်ကိုကျင့်သုံးရပါတော့တယ်။
သူငယ်ချင်းများကိုလည်း သူတို့အတွက် ဝယ်ပေးထားသော ပစ္စည်းများကိုသာ သုံးရန်နှင့်
ကျမအတွက် (လိုအပ်ချိန်မှာ အဆင်သင့်ရှိစေရန်) သီးသန့်ဝယ်ထားသော စာရေးကရိယာများကို
မသုံးရန် မေတ္တာရပ်ခံထားသည့်အချိန်မှစ၍ ဆရာမခေါ်ဆိုသော စာများကို စိတ်အေးချမ်းစွာ
လိုက်၍ ရေးနိုင်ပါတော့တယ်။

အဲဒီကျမရဲ့ အကျင့်လေးဟာ အခုနိုင်ငံခြားမှာ အလုပ်လုပ်နေတဲ့အချိန်ထိ ကပ်ပါလာခဲ့ပြန်တယ်။
ကျမရဲ့ ဧည့်ကြိုကောင်တာမှ ပစ္စည်းတချို့ကို လုပ်ဖော်ကိုင်ဖက် သူငယ်ချင်းများက လာလာယူတတ်ပါတယ်။
သူတို့တခုခု အလိုရှိပြီဆိုလျှင် ကျမဆီမှာ လာရှာတတ်ကြတယ်။ယူသွားပြီးလျှင်လည်း
ကျမဆီပြန်လာမပေးတော့ပဲ တွေ့တဲ့နေရာမှာထားခဲ့တတ်တဲ့ သူတို့ရဲ့အကျင့်ကို ကျမကလည်း
လုံးဝမကြိုက်သူဆိုတော့ ခနခနစကားများရတာပေါ့ရှင်။
အဲဒီ အသုံးအဆောင်ပစ္စည်းတွေကိုလည်း ကုမ္ပဏီကငွေနှင့် ဝယ်ရတာမို့ ပစ္စည်းတိုင်းဟာ
လူတိုင်းဆီမှာ ရှိကြသော်လည်းပဲ တခုခုလိုလျှင် ကျမရဲ့ကောင်တာက ပစ္စည်းကိုသာ လာယူသုံးတတ်တဲ့
သူတို့ရဲ့အလွယ်လိုက်မှု အကျင့်ဆိုးလေးတွေကိုတော့ မဖျောက်ဖျက်နိုင်ကြပါဘူး။

တခါတလေ...
သူငယ်ချင်းတွေစုပြီး အပြင်မှာ ဓာတ်ပုံရိုက်တဲ့အခါမျိုး၊ ဆိုင်မှာ လာစားနေကျ ရင်းနှီးလွန်းတဲ့
ဧည့်သည်တွေရဲ့ ဖိတ်ကြားမှုနဲ့ သူတို့ရဲ့အိမ်တွေကို အုပ်စုလိုက် လိုက်လည်ရတဲ့အခါမျိုးတွေမှာ
စတိုင်ကျကျ ၊ ဖက်ရှင်ကျကျ မဝတ်တတ်တဲ့ တရုပ်မလေးတွေအတွက် ကျမကပဲ ဒီဇိုင်နာလုပ်ပေးရင်း
ကျမရဲ့ အဝတ်အစားတချို့ကို ဆင်ပေးရတဲ့အခါမျိုးတွေမှာ အဲဒီအဝတ်အထည်တွေကို
ပြန်မယူတော့ပဲ သူတို့ကို အပိုင်ပေးလေ့ရှိပါတယ်..
(အဲဒီလို ပေးရာမှာလည်း ကိုယ်မဝတ်ချင်တော့တဲ့ အဝတ်အထည်မျိုး၊ အပိုင်ပေးလိုက်နိုင်တဲ့
အဝတ်အထည်ကို ရွေးပြီးဝတ်စေပါတယ်)။
ဆိုလိုရင်းက အင်္ကျီတထည်ကို တယောက်တလှည့်ဝတ်တတ်တဲ့ အကျင့် ကျမမှာမရှိလို့ပါ။

အဲဒီလိုပါပဲ...
သက်ရှိဖြစ်တဲ့ ကျမရဲ့ချစ်သူ(သို့မဟုတ်) ကျမချစ်ရတဲ့သူ ဆိုလျှင်လည်း ကျမရဲ့မူပိုင်ပဲဖြစ်စေချင်ပါတယ်။
လူဆိုတာကလည်း မိတ်ဆွေအသိုင်းအဝိုင်း၊ သူငယ်ချင်းအသိုင်းအဝိုင်း ဆိုတာတွေက ရှိသေးပြန်တော့
သဘောကောင်းပြီး လူချစ်လူခင်များတဲ့ ကျမရဲ့ချစ်သူ၊ သူတပါးကို ကူညီလေ့ရှိတဲ့ ကျမရဲ့ချစ်သူနဲ့
သူ့ရဲ့အမျိုးသမီး မိတ်ဆွေတွေ စကားပြောဆို ဆက်ဆံရာမှာလည်း သူတို့ပြောဆိုသော
စကားလုံးတိုင်းကို အဓိပ္ပါယ်ကောက်ပြီး မကြာခန ချစ်သူနဲ့ စကားများတတ်တဲ့ ကျမရဲ့အကျင့်လေးကြောင့်
ချစ်သူခမျာ အနေအထိုင်၊ စကားပြော အရမ်းဂရုစိုက်ရတာပေါ့ရှင်။
အဲဒီလိုချစ်သူနောက်က အရိပ်ကလေးလို တကောက်ကောက်လိုက်တတ်နေတာကိုက အရသာဆိုတာ
ချစ်သူရှိကြသူတိုင်းသိကြမှာပါ။
တချို့ဆိုရင် Facebook လို နေရာတွေ၊ လူငယ်စကားဝိုင်း လိုနေရာတွေ၊ ရေခဲနန်းတော်လိုနေရာတွေက
chatting တွေမှာ ချစ်သူရှိမှန်းသိသိကြီးနဲ့ ကြောင်တောင်ဝင်နှိုက်တတ်တဲ့ သူတွေကလည်း ရှိနေကြပြန်တော့...
ကိုယ့်လူ ကိုယ်ထိန်းနိုင်မှတော်ရုံကျမှာမို့........

ကျမရဲ့ငယ်ငယ်က အကျင့်လေးဟာ ကျမအတွက်သော်၎င်း....
ကျမ၏ ချစ်သူအတွက်သော်၎င်း...
အများအတွက်သော်၎င်း...
ကောင်းခြင်း၊ ဆိုးခြင်းတွေ ရှိနေပေမယ့်လည်း...
ကျမရဲ့မူပိုင်ရှင်....မောင်ဖြစ်သလို...
မောင့်ရဲ့မူပိုင်ရှင်....ကျမသာ ဖြစ်ပါရစေ....။

“နမ်းမဝ”..ဆိုတာ
သက်ရှိကို မဆိုထားနဲ့...
သက်မဲ့ပစ္စည်းလေးတခုကိုတောင် မျှဝေသုံးတတ်သူမဟုတ်သူ..ဆိုတာ..
သိမြင်တတ်ရင်ဖြင့်...။