Security အားနည်းသော မြန်မာနိုင်ငံနှင့် Ebola အန္တရာယ်

30,Augမှာကျရောက်မယ့် Blogger Day အတွက်   အကြောင်းကြောင်းကြောင့် စာမရေးဖြစ်ကြသူ အချင်းချင်း နှိုးဆော်ရင်း ဤဆောင်းပါးလေးကိုရေးဖြစ်ခဲ့သည်။ လွန်ခဲ့သော ၁၀နှစ်ခန့်က အင်တာနက်တစ်ခွင်တွင် blog    page မျာြး ပုလုပ်ကာ စာရေးသူများ ရေပန်းစားခဲ့ဖူးသည်။

                        
ထိုထဲမှ bloggerအများစုမှာ ပြည်ပတွင် နေထိုင်သူများဖြစ်သည်။ အကြောင်းကတော့ မြန်မာပြည်မှအပ တစ်ကမ္ဘာလုံးတွင် အင်တာနက် ဝက်ဆိုဒ်များကို လွတ်လပ်စွာဖွင့်ပေးထားသဖြင့် အလကားရသော blogspot.com ကိုအသုံးပြုပြီး စာရေးဝါသနာပါသူတို့ bloggerဖြစ်လာခဲ့ကြသည်။

ထိုသူများထဲတွင် ကျမလည်း တစ်ယောက်အပါအဝင်။ နိုင်ငံခြားတွင်၉နှစ်ကြာနေထိုင်ခဲ့ရင်း အတွေ့အကြုံနှင့် ဗဟုသုတများစွာကို ရေးသားခဲ့ပြီး မြန်မာပြည်ပြန်ရောက်လာချိန်တွင်တော့ မိသားစုအရေးနှင့်  အင်တာ နက်လိုင်းမကောင်းခြင်းတို့ ကြောင့် စာရေးသည့်ဖက်သို့ မလှည့်နိုင်တော့သည်မှာ ယခု ကျမ၏သားလေး အသက်(၄)လအရွယ်ပင်ရောက်ရှိခဲ့လေပြီ။   

လွန်ခဲ့သောတပတ်ခန့်က သားလေးအတွက် လက်တွန်းလှည်းတစ်စီးဝယ်ရန် စိတ်ကြိုက်မတွေ့မချင်း ရန်ကုန်မြို့တွင်းရှိ shopping centerအတော်များများသို့ သွားရောက်ရှာဖွေခဲ့သည်။shopping centerများ၏ အဝင်ဝတွင် "security"လက်ပတ်များနှင့်လုံခြုံရေးဂိတ်ကို ဖြတ်ရသည်။   ကျမလွယ်ထားသော အိတ်ကို စားပွဲပေါ်တင်ပေးပြီး ကျမက သတ်မှတ်ထားသော ရောင်ခြည်ဖြတ်ရုံလေးကို ဖြတ်လျှောက်ပေးရသည်။

shopping center တစ်ခုလုံး၏ လုံခြုံရေးကို တာဝန်ယူထားသော စစ်ဆေးသူများမှာတာဝန်အရ ဈေးဝယ်လာသူများအားစစ်ဆေးနေသော်လည်း ကြပ်မတ်မှုမရှိ။ ကျမလွယ်ထားသော အိတ်ကို စစ်ဆေးသူတစ်ဦး၏ရှေ့သို့ ချပေးလိုက်သည်။ စစ်ဆေးသူအမျိုးသမီးမှ အိတ်၏ဇစ်ကိုအဖွင့် အပိတ် လုပ်ပြီးကျမထံသို့ ပြန်ပေးသည်။ အိတ်တွင်းသို့ မွှေနှောက်ရှာခြင်းမျိုးမရှိ။ ဤသို့ဆိုလျှင် အိတ်ကို မစစ်ဆေးသည်ကမှ ကောင်းအုံးမည်။
 
ထိုနေ့က shopping centerသုံး လေးခုသို့ ကျမရောက်ရှိခဲ့သည်။ securityဂိတ်များကို ထုံးစံ အတိုင်း  ဖြတ်ကျော်ခဲ့သည်။ ကျမ၏လက်ကိုင်အိတ်ကို စစ်ဆေးရန် လုံခြုံရေးစားပွဲပေါ်သို့တင်ပေးလိုက်တော့ လုံခြုံရေးဝန်ထမ်းမှာ ကျမကိုတစ်ချက်ကြည့်ပြီး စားပွဲပေါ်တင်ပေးလိုက်သော အိတ်ကို ဖွင့်တောင်မကြည့်တော့ပဲ ပြန်ပေးပါသည်။  

အဘယ်ကြောင့်ပါနည်း။ ကျမ၏မျက်နှာပေါ်တွင် ဤshopping centerအား ဖျက်လိုဖျက်ဆီး အန္တရာယ်ပြု မည့်ပုံမျိုး မပေါ်၍စိတ်ချသွားပုံရသည်။ လူဆိုးနှင့်လူကောင်း မည်သို့ခွဲခြားထားပါသနည်း။ 

"security" ဆိုသည်မှာ ၎င်းတာဝန်ကျရာ နေရာဒေသ၏လုံခြုံရေးအတွက်  တာဝန်အရှိဆုံးလူဖြစ်သည်။

shopping centerများတွင် ဗုံးပေါက်သည်။  hotelများတွင်ဗုံးပေါက်သည်။ ဘူတာရုံများတွင်ဗုံးပေါက်သည်။ ထိုနေရာများတွင် "security"ဟုခေါ်သော လုံခြုံရေးများရှိပါလျှက် အဘယ်ကြောင့် မလုံခြုံပါသနည်း။ အင်္ကျီအနက်၊ ဘောင်းဘီအနက် မျက်မှန်အနက်နှင့် ပါးသိုင်းမွှေးမျက်နှာနဲ့မှ လူဆိုးမဟုတ်။ အဖျက်သမားမဟုတ်။ မော်ဒယ်လ်ဂဲလ်တစ်ယောက်ပုံစံမျိုးလည်းဖြစ်နိုင်သည်။ ကလေးအမေပုံစံမျိုး လည်းဖြစ်နိုင်သည်။ အဖွားအိုပုံစံမျိုးလည်းဖြစ်နိုင်သည် ။ ဤအချက်အား လုံခြုံရေးဝန်ထမ်းများမှ သတိပြု ကြပ်မတ်ရန်လိုပေသည်။ နိုင်ငံခြားတိုင်းပြည်များတွင် "security"တာဝန်ကို ထမ်းဆောင်နေသော သူများကို မြင်ဖူးကြမည်ထင်ပါသည်။ သူတို့တွင် အာဏာအပြည့်ရှိသည်။  ၎င်းတို့တာဝန် ကျရာ နေရာဒေသ၏ လုံခြုံရေးအတွက် လုပ်ပိုင်ခွင့်အပြည့်ပေးထားသည်။ မြန်မာပြည်တွင်းရှိ shopping centerများမှ securityများကတော့ ဂိတ်စောင့်သာသာ၊ ကြွက်ချောက်ငှက်ချောက်သာသာမျှ သဘော ထားနေကြခြင်းကို အားမရဖြစ်ရသည်။

---------------

(၂)   

မြန်မာပြည်မှ ပြည်ပသို့သွားရောက်အလုပ်လုပ်ကိုင်မည့်သူများ ပြည်ပသို့မထွက်ခင် ဆေးစစ်ရသည်။ "C ပိုး" "Bပိုး" ရှိမရှိ စစ်ရသည်။ ဆေးကျပါက ပြည်ပသို့ထွက်ခွင့်မရှိ။ သို့ပါသော်လည်း "Cပိုး" "Bပိုး"ရှိသူများ ဆေးအောင်ပြီးနိုင်ငံခြားသို့ ထွက်ခွင့်ရနေကြသည်။ နည်းလမ်းရှိပါသည်။  

နိုင်ငံခြားသို့သွားရောက်အလုပ်လုပ်ကိုင်မည့်ဖြူဖြူဆိုသော  မိန်းခလေးတွင် "Cပိုး"ရှိသည်ဆိုပါစို့။ ဆေးခန်း တွင် ဆေးစစ်သည့်အခါ သူမအစား  "Cပိုး"မရှိသူတစ်ယောက်အား သူမ၏အမည်ဖြင့် အစားထိုး ဝင်ရောက်ဆေးစစ်စေပြီး ဆေးအောင်မှု passကို ရယူနေကြသည်။

ဤနည်းဖြင့် သက်ဆိုင်ရာဆေးခန်းမှ ဝန်ထမ်းများ လာဘ်ပေးလာဘ်ယူပြုလုပ်ပြီး  ကျန်းမာရေးဆိုင်ရာ securityကို ချိုးဖောက်နေကြပါသည်။ သက်ဆိုင်ရာဆေးခန်းများမှ ဤအချက်ကို အထူးကြပ်မတ်ပေး ပါရန် မေတ္တာရပ်ခံချင်ပါသည်။
  ------------
(၃) 

လွန်ခဲ့သော တစ်ပတ်ခန့်က ကြည့်မြင်တိုင်ညဈေးမှ တိုက်အိုတစ်လုံး ဝရံတာပဲ့ကျ၍ လူသေမှုဖြစ်ပွားခဲ့ သည်။ ဤကဲ့သို့ တိုက်အို တိုက်ဆွေးများ မကြာခဏပြိုကျမှုများကိုလည်း သက်ဆိုင်ရာတာဝန်ရှိသူများမှ  တိုက်၏ခိုင်ခံ့မှု securityကို ကြီးကြပ်စစ်ဆေး ထိန်းသိမ်းပေးသင့်သည်။ 

နောက်ဆုံးတင်ပြလိုသည်မှာ လက်ရှိခေတ်စားနေသော Ebola virus အကြောင်းကို လူတိုင်းသိပြီးကြပြီ။ Ebola virusကူးစက်ခံရပါက ဖြေဆေးမတွေ့သေး။ ထိုEbola virus မှာ အာဖရိကနိုင်ငံဖက်မှ စတင်ဖြစ်ပွားခဲ့ရာမှ ယခုအခါ အချို့နိုင်ငံများဆီသို့ တဖြည်းဖြည်းပြန့်နှံ့လာလေပြီ။  ကျမတို့မြန်မာနိုင်ငံ တွင်းသို့ အချိန်မရွေးရောက်လာနိုင်သည်။  

Ebola virusရောဂါကူးစက်ခံရသူဟု သံသယရှိသူ  အသက်(၂၂)နှစ် အရွယ် မြန်မာလူငယ်လေး တစ်ယောက် ပြည်ပမှ မြန်မာပြည်သို့ ပြန်လာပြီး ဝေဘာဂီကူးစက်ဆေးရုံတွင် ဆေးကုသမှုခံယူလျှက်ရှိသည် ဆိုသော သတင်းတစ်ခု   အင်တာနက်တွင်ပြန့်နှံ့လျက်ရှိသည်။

ရောဂါအခြေအနေမှာ သက်သာလာပြီဟုလည်း ကြားသိရပါသည်။ ဤသည်ကား ဝမ်းသာစရာပင်။ ဤကဲ့သို့ ဆေးမတွေ့သေးသော ကပ်ရောဂါဆိုးကြီး မြန်မာပြည်အတွင်းသို့ မဝင်ရောက်နိုင်စေ ရန် မြန်မာပြည်တွင်းသို့ ဝင်ရောက်နိုင်သော လေကြောင်း ရေကြောင်း ကုန်းကြောင်းတို့မှ တာဝန်ထမ်းဆောင်နေသော လူဝင်မှုကြီးကြပ်ရေးနှင့်တကွ သက်ဆိုင်ရာကျန်းမာရေးဌါနမှ တာဝန်ရှိ သူများက securityအပြည့်ဖြင့် စိစစ်ပေးရန်လိုသည်။

ထိုသို့မဟုတ်ပါက Ebola virusရှိသူ တစ်ဦးတစ်ယောက်မှအစပြု၍ ဆင့်ပွားကူးစက်ကာ ကပ်ဘေးဆိုးကြီးကို ရင်ဆိုင်ကြရမည်ကို တွေးရင်း "security"အလွန် အားနည်းသော မြန်မာပြည်မှ ပြည်သူတစ်ယောက်အနေဖြင့် လွန်စွာစိုးထိတ်မိပါကြောင်း တင်ပြရင်းးး ဤဆောင်းပါးလေးကို Blog Day အမှတ်တရအဖြစ် ရေးသားလိုက်ပါသည်။

(မီးဆိုတာ မလောင်ခင်က တားရပါတယ် လောင်ပြီးမှဆိုရင်တော့… )

စာဖတ်သူများနှင့်တကွ စာရေးသူသူငယ်ချင်းချင်းများအားလုံး Happy Blog Day ပါနော်။