မျိုးဆက်သစ်များ ယဉ်ကျေးမှုကို ထိန်းသိမ်းစေချင်

ဒီနေ့ဆိုင်မှာ အလုပ်လုပ်နေရင်းစာရွက် မိတ္တူကူးစရာရှိလို့ ရုံးခန်းထဲကို သွားခဲ့ပါတယ်။
ရုံးခန်းထဲရောက်တော့ သူဌေးက တီဗီကြည့်နေရင်း မိတ္တူကူးနေတဲ့ကျမကို စကားလှမ်းပြောပါတယ်။
အဲဒီစကားကတော့ “ငါ အခုလေးတင်ပဲ မင်းတို့နိုင်ငံရဲ့သတင်းကိုကြည့်နေတာ”

“သတင်းထဲမှာ မင်းတို့နိုင်ငံက ၁၀ကျော်သက်တွေရဲ့ဝတ်စားဆင်ယင်မှုတွေကိုပြတယ်”ကျမလည်း မျက်လုံးအပြူးသားနဲ့ စိုးရိမ်တစ်ကြီးလှမ်းမေးလိုက်ပါတယ်

“ဟင်..ဟုတ်လား.. ဘယ်လိုပုံတွေကိုပြတာလဲ”
သူဌေး။ ။ “၁၀ကျော်သက် လူငယ်တွေ အဝတ်အစားဝတ်တာ တခြားနိုင်ငံတွေလို
ခေတ်ဆန်လာတာတွေကို ရိုက်ပြထားတာပါ”

သူဌေးရဲ့မျက်နှာကို လှမ်းပြီးအကဲခတ်လိုက်တော့ ထူးခြားမှုသိပ်ပြီးမတွေ့ရဘူး။
ကျမ စိုးရိမ်သွားတာက လောလောလတ်လတ်ဖြစ်ပေါ်နေတဲ့ FB ပေါ်က “သင်္ကြန်ဝတ်စားဆင်ယင်မှုကို ရှုံ့ချထားတဲ့နိုင်ငံခြားရောက်မြန်မာအမျိုးသမီး(၂)ဦး”ရဲ့ ဗွီဒီယိုတွေကိုကြည့်ထား နားထောင်ထားတဲ့ကျမ၊ သင်္ကြန်တုန်းက ပုံတွေကို သူဌေးမြင်သွားလားဆိုတာကိုပါပဲ။

ကျမကသာ စိုးရိမ်နေတာပါ၊ သူဌေးကတော့ ကျမကို မြန်မာမှန်းသိထားတာကြောင့် TVသတင်းမှာ မြန်မာပြည်အကြောင်း ပြတာကို သတင်းပေးတဲ့အနေနဲ့ ပြောယုံလောက်ပါပဲ။

သင်္ကြန်မတိုင်ခင်ကလည်း ငလျှင်လှုပ်တဲ့သတင်း၊ အင်ဒိုနီးရှားက မုန်တိုင်းသတင်းကိုလည်း သူကပဲ ပြောပြတာ။
အန်တီစုအကြောင်းဆိုလည်း သတင်းမှာ လာသမျှ သူကအကုန်ပြောပြနေကျ။

ကျမ သက်ပျင်းတစ်ချက်ချမိပါတယ်..။
ဘာကြောင့်လဲဆိုတော့ ကျမ အလုပ်လုပ်တဲ့ တရုတ်စားသောက်ဆိုင်ကြီးမှာ ကျမဟာ တရုတ်ဝတ်စုံနဲ့ မြန်မာဝတ်စုံကိုဝတ်လေ့ရှိပြီး မြန်မာပြည်ရဲ့ယဉ်ကျေးမှုအကြောင်းကို အချိန်ရရင် ရသလိုပြောပြနေကျမို့ အခု သူဌေးကြည့်မိသွားတဲ့ သတင်းထဲက “မြန်မာတွေ ခေတ်ဆန်လာပြီ” ဆိုတဲ့ ပုံရိပ်တွေဟာ ဘယ်လိုပုံတွေများမိုလို့ ဆိုက်ပရပ်စ်လို ကျွန်းနိုင်ငံလေးရဲ့TVဖန်သားပြင်ပေါ်မှာ သတင်းတစ်ခုအနေနဲ့ ပြရလောက်အောင် ဖြစ်လာသလဲဆိုတာကို တွေးနေမိပါတယ်။

ပြီးခဲ့တဲ့လက ဆိုက်ပရပ်စ်အစိုးရက တာဝန်ရှိသူတွေ မြန်မာပြည်ကို သွားကြတယ်၊ စီးပွားရေးကိစ္စတွေ ဆွေးနွေးတိုင်ပင်လာကြတယ်လို့လည်းသိရပါတယ်။
အဲဒီတုန်းက ရိုက်လာတဲ့ ဗီဒီယိုတွေလည်းဖြစ်နိုင်ပါတယ်။

ကျမကတော့ ကိုယ့်နိုင်ငံအတွက် မလုံမလဲဖြစ်ရပါတယ်၊
ရှေ့ကကြွား... နောက်က ဖော်သလိုများဖြစ်နေမလားလို့ပေါ့....။

ဘယ်လိုပဲဖြစ်ဖြစ် ခေတ်ဆန်တာလည်း ဆန်ကြပါ..
သူ့နေရာနဲ့သူ ဝတ်စားဆင်ယင်နိုင်ပါတယ်
မြန်မာဝတ်စုံကိုပဲဝတ်ပြီး ခေတ်နောက်ပြန်ခိုင်းနေတာမျိုးမဟုတ်ပါဘူး
လှအောင်ဝတ်လို့ရပါတယ်
ကိုယ့်အဝတ်အစားနဲ့ကိုယ် သူများလက်ညှိုးထိုးခံရလောက်အောင် သရုပ်ပျက်လာတာကတော့ ကိုယ့်အတွက်လည်းမကောင်းဘူး၊ မိဘ ဆွေမျိုးတွေအတွက်လည်းမကောင်းဘူး၊ တိုင်းပြည်အတွက်လည်းမကောင်းဘူးပေါ့၊
ခေတ်ဆန်တာနဲ့ခေတ်ပျက်တာ..
တစ်နည်းအားဖြင့် ယဉ်ကျေးမှုကို ပျက်အောင်ဖျက်နေတာမျိုးတော့ မဖြစ်စေချင်ပါဘူး၊
ကိုယ့်ရဲ့ယဉ်ကျေးမှုကိုတော့ ထိန်းသိမ်းကြစေချင်ပါတယ် ။


ဝန်ခံချက်။ ။ လတ်တလော ကျမကြုံတွေ့ခဲ့ရတဲ့ အဖြစ်အပျက်နဲ့ ခံစားချက်လေးကို ချရေးယုံသက်သက်ပါ။

Posted in: ဆောင်းပါး