တစ်နေ့တာ... (တဂ်ပို့စ်)

ညီမလေး Blackroze နဲ့ မောင်လေး အမောင် တို့ တဂ်ထားတဲ့ “တစ်နေ့တာ..” ဆိုတဲ့ ပို့စ်လေးကို ရေးပေးဖို့ နောက်ကျခဲ့တဲ့အတွက် တောင်းပန်ရင်း ရေးပေးလိုက်ပါတယ်။

*အိပ်ယာကနိုးနိုးချင်းအရင်ဆုံး ဘာလုပ်သလဲ
+တစ်နေ့တာ စိတ်ရွှင်လန်းစေဖို့အတွက် “ကောင်းသောနိုးထခြင်း”ဆိုတဲ့ နိုးထခြင်းမျိုးနဲ့ နိုးထစေဖို့အတွက် အိပ်ယာထဲမှာ ၁၀မိနစ်လောက်နှပ်ပြီးမှ ပေါ့ပါးလွတ်လပ်စွာ အိပ်ယာပေါ်မှ ထတတ်တာ ကျမရဲ့အကျင့်တစ်ခုပါ။ အဲဒီလို စိတ်ကို ကြည်လင်စေဖို့ မျက်စိနှစ်လုံး ပွင့်တာနဲ့ ကုတင်ဘေးက ခုံပေါ်မှာ တင်ထားတဲ့ ကွန်ပျူတာကို ဖွင့်ပြီး Facebookရွာထဲကို အရင်မွှေပါတယ်။ :D

*မနက်စာကို ဘယ်လိုအစားအစာ စားရတာကြိုက်ပါသလဲ
+မနက်စာအတွက် အများဆုံးစားဖြစ်တာကတော့ Quick Food လို့ခေါ်တဲ့ ပေါင်မုန့်ထောပတ်သုပ်(သို့)ဘီစကစ်(သို့) ရယ်ဒီမိတ် မုန့်ဟင်းခါး(သို့) ခေါက်ဆွဲပြုတ်ရယ် မတ်ခွက်နဲ့အပြည့်ဖျော်ထားတဲ့ ကော်ဖီတစ်ခွက်ပါ။

*လောလောဆယ်နေ့တိုင်းစားဖြစ်နေတဲ့ မနက်စာ...

+မပါမဖြစ်တဲ့ မတ်ခွက်အပြည့် ကော်ဖီတစ်ခွက်နဲ့ ပေါင်မုန့်ထောပတ်သုပ်။

*နေ့လည်စာကို ဘယ်လိုနေရာမျိုးမှာစားရတာကြိုက်ပါသလဲ
+ဖြစ်နိုင်ရင်တော့ ပင်လယ်ကမ်းစပ်မှာဖွင့်ထားတဲ့ဆိုင်လေးတွေမှာ စားချင်ပါတယ်။
ဆိုက်ပရပ်စ်နိုင်ငံမှာက တနင်္ဂနွေနေ့လို ရုံးပိတ်ရက်တွေမှာ ဆိုက်ပရပ်စ်နိုင်ငံသားများဟာ နေ့လည်စာကို အလေ့အကျင့်တစ်ခုအနေနဲ့ အပြင်ထွက်စားလေ့ရှိကြပါတယ်။

*အခုလက်ရှိအစားချင်ဆုံးဟင်းကိုပြောပြပါ
+မြန်မာဟင်းတွေကတော့ ကိုယ်တိုင်ချက်စားနေကျမို့ အစားချင်ဆုံးဆိုတာ မရှိပါဘူး၊ တစ်ကယ်စားချင်နေတာကတော့ ကုလားမ လုပ်တဲ့ တိုရှည်ပါ၊ (ကုလားအစားအစာများကို ကျမ အလွန်ကြိုက်ပါတယ်)။


*အလုပ်မှာကော်ဖီ ဘယ်နှစ်ခွက် သောက်ပါသလဲ
+ဘိန်းစွဲသလို မသောက်ရင်မနေနိုင်တာကတော့ ကော်ဖီပါ။ ကော်ဖီထဲမှာ လူကိုActive ဖြစ်စေတဲ့ ကဖိန်းဓာတ်ပါတယ်လို့ စာတွေထဲမှာ ဖတ်ဖူးပေမယ့် အကျိုးသက်ရောက်မှု တစ်ကယ်ရှိ/မရှိဆိုတာကို ကျမ မသိပါ။ သို့သော် အလုပ်ထဲရောက်တာနဲ့ ကော်ဖီတစ်ခွက်ကို အရင်သောက်ပြီးမှ အလုပ်လုပ်လေ့ရှိပါတယ်။ အတိအကျဖြေရမယ်ဆိုရင်တော့ (၁)ခွက်ပေါ့။

*ညနေစာကိုဘယ်မှာစားတတ်ပါလဲ
+အလုပ်ထဲမှာစားလေ့ရှိပါတယ်။

*ညနေစာစားရင်းနဲ့ အများဆုံးစဉ်းစားဖြစ်တတ်တဲ့ အကြောင်းအရာ
+အလုပ်ထဲမှာပဲ ညနေစာစားလေ့ရှိတာကြောင့် အလုပ်အကြောင်းပဲ စဉ်းစားဖြစ်ပါတယ်၊ ကျမ အလုပ်က တာဝန်ကြီးတယ်၊ အလုပ်ထဲရောက်တာနဲ့ ပြဿနာပေါင်းစုံက ကျမကိုဆီးကြိုနေကျမို့ အလုပ်“စ”ချိန်နဲ့ အလုပ်သိမ်းချိန်တွေမှာ စဉ်းစားမိတာ အလုပ်အကြောင်းပါ။

*အလုပ်ဆင်းတဲ့အချိန်မှာခံစားချက်..
+တစ်နေ့တာ လုပ်ငန်းတာဝန်ပြီးဆုံးချိန်မှာတော့ မာန်အပြည့်၊ ဟန်အပြည့်နဲ့အလုပ်လုပ်နေရတဲ့ ကျမအတွက် အင်အားအတော်လျော့ပါးနေပြီပေါ့။ အဲဒီလိုအချိန်မှာ ကျမရဲ့အခန်းထဲရောက်လို့ ခံစားမိတာကတော့ “လွတ်လပ်ပေါ့ပါးခြင်း”နဲ့ယှဉ်တွဲနေတဲ့“ပင်ပမ်းနွမ်းနယ်ခြင်း”ဝေဒနာပါပဲ။

*အိမ်ပြန်ရောက်ရောက်ချင်းဘာအရင်လုပ်တတ်သလဲ
+ကျမအခန်းထဲရောက်တာနဲ့ ကွန်ပျူတာကို အရင်ဦးဆုံးဖွင့်ပါတယ်။

*ဒုတိယလုပ်မိတာလေး..
+အလှည့်ကျ ရေချိုးခန်းတန်းစီရင်း Email စစ်ပါတယ်၊ Facebook ဖွင့်ပါတယ်။ စာဖတ်ပါတယ်။

*ညမအိပ်ခင်ကော်ဖီသောက်တတ်ပါသလား..
+မသောက်တတ်ပါဘူး။

*ညအိပ်ယာထဲဝင်ဝင်ခြင်းအချိန်ဘာအရင်ဆုံးလုပ်ပါသလဲ...
+ဘုရားရှိခိုးပါတယ်။

*အိပ်မပျော်တဲ့ညတွေမှာ ဘာလုပ်သလဲ
+ကဗျာရေး..စာရေးပါတယ်။

*တအားစိတ်ဓါတ်ကျလာတဲ့အခါမျိုး စိတ်အားငယ်တဲ့အခါမျိုးတွေမှာ ဘာလုပ်တတ်သလဲ
+သူငယ်ချင်းတစ်ယောက်ယောက်ကိုရင်ဖွင့်တတ်ပါတယ်။
တစ်ခါတစ်လေ ပင်လယ်ကမ်းစပ်ပေါ်မှာတစ်ယောက်ထဲသွားထိုင်နေတတ်ပါတယ်။

*အပြင်သွားတဲ့အခါ အမြဲတမ်းသတိထားပြီးယူတတ်တဲ့ပစ္စည်း
+သေခြာပါတယ်..၊ မပြောလည်း သိတယ်ဟုတ်၊ ဘာပစ္စည်းဖြစ်မလဲ??????

*မိသားစုဝင်တွေထဲမှာ အချစ်ရဆုံးသောလူ
+ဖေဖေ၊ မေမေနဲ့ ကျမ၊ (၃)ယောက်ပဲရှိတဲ့ မိသားစုလေးထဲမှာ အချစ်ရဆုံးသူလို့မေးရင် ဖေဖေ့ကို မေမေ့ထက်ပိုချစ်ပါတယ်၊
ဖေဖေက ကျမ ပူဆာသမျှအကုန်ဝယ်ပေးတယ်၊
မေမေကတော့ စည်းနဲ့ကမ်းနဲ့ စိစစ်နေတာနဲ့ပဲ လိုချင်တာ မရတာများပါတယ်။ အဲဒါက ငယ်ငယ်တုန်းက ခံစားချက်ပေါ့။သမီးတွေဟာ အဖေကို ပိုချစ်တတ်ကြသတဲ့။ သားတွေကတော့ အမေကိုပိုချစ်ကြတယ်လို့ကြားဖူးပါတယ်။

*သူစိမ်းတွေအထဲမှာ မိမိအယုံကြည်ရဆုံးသူ
+အယုံကြည်ရဆုံးသူ..ဆိုတာ တစ်ကယ်တော့ ပြောရခက်ပါတယ်။
“စိတ်”ဆိုတာကလည်း အခက်သားလား၊ ချစ်ခင်နေကြတဲ့အချိန်မှာ ဆိုးတိုင်ပင် ကောင်းတိုင်ပင် သူငယ်ချင်းတွေရှိပေမယ့်၊ စိတ်အခန့်မသင့်လို့ မုန်းစိတ်ဝင်လာတဲ့အချိန်မှာ နောက်ကျောဓားနဲ့ထိုးတဲ့သူတွေလည်းရှိတာမို့ “အယုံကြည်ရဆုံးသူ”ဆိုတဲ့မေးခွန်းအတွက် အဖြေဟာ အခြေနေနဲ့ အချိန်အခါကိုလိုက်ပြီး ပြောင်းလဲတတ်ပါလိမ့်မယ်။

*အလုပ်ထဲမှာကိုယ်အခင်ဆုံးသူ
+လုပ်ဖော်ကိုင်ဖက်သူငယ်ချင်းတွေထဲက စိတ်တူ တဲ့သူပေါ့။


*ကိုယ်မှာရှိတဲ့ပစ္စည်းတွေထဲကအကြိုက်ဆုံးပစ္စည်းလေးတခု..
+အဟေး။။။ ချစ်သူထက် ချစ်တယ်။


*လက်ဆောင်ရထားတဲ့အထဲကအကြိုက်ဆုံးပစ္စည်းလေးတခု
+မွေးနေ့လက်ဆောင်ကဗျာများ

*ကိုယ့်ပတ်သက်ဖူးတဲ့သူတွေထဲမှာကိုယ့်ကို နားလည်ခွင့်လွှတ်ပေးနိုင်ဆုံးသူ
+ဘလော့ဂ်ကာတွေထဲက သူငယ်ချင်းတစ်ချို့

*အခုလောလောဆယ်အဖြစ်ချင်ဆုံးဆန္ဒ
+တိတ်တိတ်လေး ဆုတောင်းထားတယ်.. မမေးနဲ့..ပြောဘူး..း)

*ဖြည့်ဆွက်ချင်တာလေး
+ကျမရဲ့တစ်နေ့တာကတော့..
အလုပ်ပြန်နောက်ကျတဲ့ကျမအတွက် အိမ်ပြန်ရောက်တဲ့အချိန်ဟာ မနက်၁နာရီဖြစ်နေပါပြီ(မြန်မာပြည်စံတော်ချိန်ဆိုရင် မနက်၅နာရီ၄၅ပေါ့)။
အိမ်ပြန်ရောက်လို့ ခဏအနားယူပြီး ရေချိုးခန်းအလှည့်ကျဖို့စောင့်ရင်း E mailစစ်ခြင်း၊ Blog လည်ခြင်း၊ Facebookမှ သတင်း၊အတင်းများကို ဖတ်ပါတယ်။
အဲဒါတွေပြီးလို့ ကျမအိပ်တဲ့အချိန်ဟာ ဆိုက်ပရပ်စ်အချိန် မနက်၃နာရီဖြစ်နေပါပြီ။
မနက်၁၁နာရီမှာ ကျမ အိပ်ယာနိုးပါတယ်(အိပ်ချိန်၈နာရီအပြည့်အိပ်မှ ကျမ ခေါင်းကြည်တတ်လို့ပါ)။
မျက်နှာသစ်ပြီးလို့ မနက်စာစားပြီးချိန်မှာ အွန်လိုင်းခဏတက်ပါတယ်၊ နေ့လည်၁၂နာရီမှ ညနေ(၃)နာရီအထိ အခန်းတွင်းမှာ ဝန်ထမ်းများရဲ့အင်္ကျီများ၊ ကုမ္ပဏီလက်အောက်ခံ ဆိုင်(၅)ဆိုင်ရဲ့လက်သုတ်ပုဝါများ၊ စားပွဲခင်းများ၊ အစရှိသည့် ဝန်ထမ်းအသုံးအဆောင်၊ စားသောက်ဆိုင်အသုံးအဆောင်ပစ္စည်းများကို ချုပ်လုပ်ရတာ ကျမရဲ့နေ့စဉ်အလုပ်ပါ။ အခန်းတွင်းမှာ စက်ချုပ်ရတဲ့အတွက် ကွန်ပျူတာကို ကျမဖွင့်ထားပေမယ့် မအားပါဘူး။ အွန်လိုင်းပေါ်မှာ ကျမရှိနေပေမယ့် ကျမအခန်းထဲမှာ စက်ချုပ်နေတာကို ခင်မင်တဲ့သူငယ်ချင်းများအားလုံးက သိကြပါတယ်။
ညနေ (၃)နာရီမှာ ဆိုင်က ကျမစားဖို့ ထမင်းနဲ့ဟင်း လာပို့ပါတယ်။ ထမင်းစားပြီး (၃)နာရီနဲ့(၄)နာရီကြား၊၁နာရီခန့် ကျမ အွန်လိုင်းတက်ပါတယ်။
ညနေ(၄)နာရီမှာ ရေချိုး အလှပြင်ပြီး ညနေ(၅)နာရီမှာ စားသောက်ဆိုင်မှာ အလုပ်ဆင်းရပါတယ်။
အလုပ်ပြီးချိန်ကတော့ ည(၁၂)နာရီနဲ့(၁)နာရီကြားပေါ့။
အဲဒါ ကျမရဲ့နေ့စဉ်လည်ပတ်နေတဲ့ ဘဝရဲ့တစ်နေ့တာ... အချိန်ဇယားပါပဲ။
မတ်လမှ စက်တင်ဘာလအတွင်း ပိတ်ရက်မရှိ အလုပ်လုပ်ရပါတယ်။
ရသင့်ရထိုက်တဲ့ ပိတ်ရက်များနဲ့ Holiday ရက်များကို ဆောင်းတွင်းဖြစ်တဲ့ အောက်တိုဘာလမှ ဖေဖော်ဝါရီလအတွင်း (၁)ပတ်မှာ နားရက် (၃)ရက်နှုန်းဖြင့် ခွင့်ရက်များကို အကုန်ပြန်ပေးပါတယ်။
အဲဒီလိုနားရက်တွေမှာတောင် Special Function တွေရှိလာတဲ့အခါ ကုမ္ပဏီက ခေါ်ခေါ်ခိုင်းတတ်တာကြောင့် ကမ္ဘာ့အလုပ်အများဆုံးစာရင်းဝင်တွေထဲမှာ ကျမလည်းပါမည်ထင်ပါကြောင်း.. ဟာသနှော၍ “တစ်နေ့တာ...” ပို့စ်လေးကို အဆုံးသတ်လိုက်ပါတယ်..။
:)

Posted in: တဂ်ပို့စ်